Mazibuko dalk Zille se opvolger
2011-05-22 11:00
Johannesburg - Helen Zille, DA-leier, het vir die eerste keer aangedui dat sy Lindiwe Mazibuko, die party se nasionale woordvoerder, as haar moontlike opvolger beskou.
Zille het Vrydag by die OVK se uitslagsentrum gesê sy het 16 aande in haar eie bed geslaap sedert die party se verkiesingsveldtog in Februarie begin het.
In die aanloop tot die munisipale verkiesing het die DA openlik met swart kiesers geflankeer, en ’n rits swart stemgebiede gewen.
Dit sluit in een wyk in Tswaing in Noordwes en nog een in die Oos-Kaap se Lady Frere.
Haar party se veldtog om meer swart stemme te werf, moes egter nie hul tradisioneel wit ondersteuners van die DA vervreem nie.
“Die volgende leier van die DA sal waarskynlik swart wees. Ek kan dit nie waarborg nie, maar ons het uitsonderlike talent,” het Zille gesê met klaarblyklike verwysing na Mazibuko.
Mazibuko het aandag getrek met die wyse waarop sy ANC-swaargewigte laat les opsê het in debatte, asook haar bereidheid om in arm en tradisioneel vyandiggesinde gebiede vir die DA stemme te werf.
“Ek kan vir jou sê dit sal ons ondersteuning versterk en nie verswak nie, want alle Suid-Afrikaners wil hê dat hul stem relevant moet wees,” het Zille gesê.
Die DA se aandeel in die stemme het van 16,3% in 2006 tot 24% gegroei, terwyl sy swart stemme van minder as 1% in 2009 tot 5% gegroei het. Sy sê die identiteit van politiek is ’n bepalende faktor van politieke keuses.
“Ons ontken nie die identiteit of erfenis van apartheid nie. Ons sê net mense word nie meer slegs aan ras geken nie. Ons verstaan die nagevolge van apartheid en só ook die emosionele skade.”
Die ANC-jeugleier, Julius Malema, se beskrywing van Mazibuko as die “madam se teagirl” dui daarop dat die ANC ’n seksistiese party is, meen Zille.
- Rapport