Max dreig glo met die dood
2011-07-23 08:21
Kaapstad – Die saak waarin adv. Lennit Max vir Belinda Petersen van afpersing aankla, sal nou op Malmesbury aangehoor word weens ’n oorvol hofrol.
Die verhoor, wat Donderdag in die Kaapse streekhof begin het, sou Vrydag in dié hof hervat word.
Petersen het Donderdag skuld ontken op ’n aanklag van poging tot afpersing.
Streeklanddros Michele Adams het Vrydag gesê weens ander sake wat voorkeur moet kry, asook die laatkommery van sekere mense, is die saak na die Malmesbury-streekhof oorgeplaas.
Adv. Christhénus van der Vijver, staatsaanklaer, het gesê die staat en die verdediging het besluit op gepaste datums – 7 en 8 September.
Adv. Sakkie Maartens, Petersen se regsverteenwoordiger, het aan Adams gesê daar was twee aspekte wat die verdediging nie Donderdag in Max se kruisondervraging geopper het nie, naamlik die bewering van verskeie “seksueel suggestiewe” SMS-boodskappe wat Max glo aan Petersen gestuur het.
Die ander hou verband met Petersen wat Max na bewering gebel en gevra het hoe hy sal reageer indien sy koerante toe gaan. “Hy het glo aan haar gesê hy sal haar doodmaak indien sy met die media praat.”
Luidens die klagstaat het sy Max tussen Oktober 2007 en Februarie 2010 doelbewus onder druk geplaas of die skrik op die lyf probeer jaag deur hom af te dreig. Sy het glo gesê as hy haar nie ’n pos in sy departement aanbied nie, sal sy sekere inligting oor hom uitblaker.
Petersen is in 2007 aan Max voorgestel toe sy regsverteenwoordiging nodig gehad het in ’n dispuut met haar destydse werkgewer weens seksuele teistering.
Max voer aan hy het ingestem om haar gratis in dié saak te verteenwoordig. Hy was in daardie stadium die Wes-Kaapse minister van gemeenskapsveiligheid. Volgens Petersen het Max sekere “paaiemente” vir sy dienste vereis.
Max het getuig hy het hom later aan die saak onttrek. Dit was na bewering sowat vier dae voor die begin van die verhoor.
Maartens het gesê Max het haar soos ’n “warm patat” voor die verhoor gelos en sy het gevolglik haar werk verloor.
Volg Nuus24 op Twitter.
- Die Burger