Matriekvraestelle lek uit
2009-10-21 19:22
Johannesburg – Drie persone is in Nelspruit in hegtenis geneem nadat dit aan die lig gekom het dat hulle in besit was van 2009 matriekvraestelle, het die polisie Woensdag gesê.
Die twee matrikulante en ‘n onderwyser het glo die wiskunde-, natuurwetenskappe- en rekeningkunde-vraestelle by hulle gehad, het kapt. Leonard Hltahi, polisiewoordvoerder, gesê.
Volgens hom is die een leerling en die onderwyser albei Dinsdag in hegtenis geneem en die twee verdagte Woensdag.
“Hulle sal Donderdag in Nelspruit in die landdroshof verskyn,” het Hlathi gesê.
Die vraestelle is nou in die polisie se besit en maak deel uit van bewyse in die saak teen die onderwyser en matrikulante.
Jasper Zwane, woordvoerder van die departement van onderwys, het die voorval bevestig.
Die eksamens sal op 26 Oktober begin.
–Sapa