'Matriekuitslae moet vroeër uitkom' – ANCYL
2012-01-16 12:40
Johannesburg – Die ANC-jeugliga (ANCYL) in Gauteng sê matriekuitslae moet vroeër uitgereik word om chaos by universiteite te vermy.
“Die uitreiking van die uitslae ‘n dag voor die tersiêre instellings oopmaak, dra by tot die chaos wat kenmerkend is tydens aansoeke soos wat by UJ [Universiteit van Johannesburg] gesien is,” het Ayanda Kasa-Ntsobi, provinsiale sekretaris van die ANCYL, in ‘n verklaring gesê.
Gloria Sekwena (47) het op 10 Januarie tydens die aansoekproses in ‘n stormloop by die universiteit gesterf. Meer as 20 mense is beseer.
Kasa-Ntsobi meen die voorval het die regering geleer om “konkrete stappe” te neem om die langtermyn-probleme wat ons onderwysstelsel in die gesig staar, op te los.
Sy sê die voorval is ‘n bewys dat die regering ‘n nuwe plan moet skep om vir tersiêre studente van oor die land te voorsien.
“’n Deel van die realiteit is dat ons steeds provinsies soos Mpumalanga en die Noord-Kaap het, wat nie tersiêre instellings het nie,” het sy gesê.
Floyd Shivambu, woordvoerder vir die jeugliga, het Donderdag gesê die departement van hoër onderwys moet erken dat daar ‘n kritieke tekort is aan spasie in tersiêre instellings.
Hy het gesê die ANCYL sal met Blade Nzimande, minister van hoër onderwys, vergader om die behoefte aan nuwe universiteite, te beklemtoon.
Volg Nuus24 op Twitter
- SAPA