Matrieks nie ingelig oor rekordeksamen
2010-09-03 08:00
Die Burger
Kaapstad - Wes-Kaapse matrikulante is paniekerig en verward oor die September-eksamens. Hulle weet nie of hulle dit gaan skryf nie, en indien wel wanneer nie.
Verskeie matrikulante het Donderdag aan Die Burger gesê hulle het nog nie eksamenroosters ontvang nie en het geen idee wanneer hulle weer by skole moet aanmeld nie.
Die September-eksamen moet voor die 23ste van vandeesmaand afgehandel wees, wanneer die skoolvakansie aanbreek.
Die September-eksamen is veral vir matrikulante belangrik omdat dit deel is van deurlopende evaluering, wat 25% van hul finale punt uitmaak.
Een van die grootste onderwysvakbonde, die Suid-Afrikaanse Demokratiese Onderwysersunie (Sadou), staak sedert 10 Augustus. Die rekordeksamens in Gauteng, Noord- en Oos-Kaap, Vrystaat en Noordwes is reeds weens die staking uitgestel.
“Baie leerders het nie goed gevaar in die Junie-eksamen nie en hoop om hul punte met die September-eksamen te verbeter. Op die oomblik lyk dit nie of dit moontlik gaan wees nie,” het Mnoneleli Ngubo van die Hoërskool Chris Hani in Khayelitsha gesê.
Hulle het nog glad nie ’n eksamenrooster ontvang nie.
Ngubo en ’n groepie maats gaan elke oggend skool toe, maar kom voor geslote hekke te staan.
“Ek kry gereeld onderwysers in die winkel en vra dan wanneer die skool weer begin.
“‘Ons wag vir die vakbonde,’ is al wat hulle te sê het.”
Ntombesizwe Mkonto van die Sekondêre Skool Wynberg het gesê net hul drama-onderwyser is by die skool.
“Ons finale praktiese eksamen begin oor twee weke en dus oefen ons op die oomblik. Geen ander klasse word aangebied nie.
“Dié onderwyser het gesê ons begin dalk Vrydag (vandag) met eksamen. Ek kan nie insien hoe dit moontlik is nie.”
Paddy Attwell, woordvoerder van die Wes-Kaapse onderwysdepartement, het gesê hulle sou na verwagting gister terugvoering gekry het oor watter skole erg deur die staking geraak is.
“Ons het ’n gedetailleerde plan saamgestel om dié skole met die aflê van September-eksamens te ondersteun.”
Volg Nuus24 op Twitter
- Die Burger