Matrieks: 10 uit 10 vir goeie gedrag
2010-12-12 08:21
Die matriekklas van 2010 se finale eksamenuitslae word eers vroeg in
Januarie bekend gemaak, maar vir goeie gedrag tydens hul
vakansiekaperjolle kry hulle reeds puik punte.
Volgens die Red
Frogs, ’n organisasie wat tydens dié feesvieringe in Ballito en Umhlanga
hulp en steun aan matrieks bied, vaar die 2010- klas baie goed. Dit is
ondanks dat vanjaar se fees die grootste nóg was en daar in vorige jare
rillerbeelde van jongelinge wat uithaak oral in koerante verskyn het.
“Ons
het ook baie positiewe terugvoer van verskeie hotelbestuurders en
-organiseerders gekry,” sê Jess Basson, woordvoerder van die Red
Frogs.
“Nie alle tieners ruk handuit nie. Die meeste was prettig
en verantwoordelik en het na mekaar omgesien terwyl hulle
hoërisiko-situasies probeer vermy het.”
Dié amptelike vakansie
van twee weke aan kusdorpe soos Ballito, Umhlanga, Margate, Hartenbos en
Plettenbergbaai het gister geëindig.
Met die kommersiële
vernuwing van dié feesvieringe sowat ’n dekade gelede was daar vrese dit
sou ontaard in ’n seks-, drank- en dwelmorgie soos die berugte Spring
Break in Kalifornië in Amerika.
Op die Facebook-groep
“Matriekvakansie 2010” was daar onder andere ’n partytjiebus wat
“stripper vidi ouens en vidi girls (...) party games oral en baie drank
(...) en wet t shirt contest” (sic) geadverteer het.
Minderjarige
tieners wat saamkuier is dikwels die grootste probleem en die Red Frogs
het verlede week ’n oproep van ’n matriekmeisie gekry dat haar
16-jarige vriendin saam ’n 19-jarige man verdwyn het. Hulle het haar uit
die man se hotelkamer gaan haal en veilig terugbesorg.
“Veral
oor naweke neem meer minderjarige tieners aan die partytjies deel. Dis
beslis veiliger as dit net matrieks is, maar die meer ernstige voorvalle
vind plaas wanneer ouer universiteitstudente saamkuier.”
Mike Silver, direkteur van Stretch Experiential Marketing, sê dit was
beslis die grootste jaar dat hulle aan projekte en bemarking vir die
fees gewerk het.
“Die Afrikaanse mark het veral gegroei met meer tieners van Gauteng en die Vrystaat in Plettenbergbaai.”
Silver
glo die media fokus meer op die negatiewe aspekte van matriekvakansies.
Hy glo dit is ’n baie meer positiewe uitlewing van hul nuutgevonde
vryheid.
- Rapport