Matriek gedop? Londen roep!
2010-01-20 19:48
Pretoria –Suid-Afrikaanse matrikulante, selfs die wat nie matriek geslaag het nie, kan nou in Brittanje gaan werk en studeer, het ‘n reisagentsap Woensdag gesê.
"Daar is goeie nuus vir 18 tot 45-jariges omdat hulle nou kan aansoek doen vir ‘n studentevisum vir Brittanje. Dit sal toelaat dat hulle studeer en werk op dieselfde tyd,” het Liezl Gericke, besturende direkteur van STA Travel gesê.
Volgens Gericke kan selfs diegene wat nie hul matriekeindeksamen geslaag het nie aansoek doen vir dié visum, mits hulle vir laer vlak programme aansoek doen.
Die visum vereis dat die wat aansoek doen vir ‘n minimum van 15 ure per week studeer. Hulle mag ook dan vir 20 ure per week werk en kan tydens vakansietye soveel werk soos wat hulle wil. Gericke sê studente in Brittanje kan tot 4 maande vakansie kry.
“Baie van ons matrikulante hou van die idee om in Brittanje te studeer omdat hulle weet dat ‘n internasionale kwalifikasie waarde tot hul CV’s sal heg en beter werksgeleenthede bring,” het Gericke gesê.
Wanneer visumhouers hul studies voltooi het kan hulle dan ook aansoek doen om vir twee jaar in Brittanje te werk.
Gericke sê Suid-Afrikaners moet genoeg geld hê om vir die studies te betaal en ook aan die Britse Hoë Kommissaris se vereistes vir ‘n visum voldoen.
Hulle moet ook kan bewys dat hulle toegang het tot sowat R87 800. Dit moet in die persoon se bankrekening wees wanneer daar vir die visa aansoek gedoen word, maar hoef nie noodwendig saam met die persoon na Brittanje te gaan nie.
- Sapa