Maties gons oor mansvryers in kampuskoerant
2010-08-15 08:00
Wanneer die Universiteit van Stellenbosch se studentekoerant, Die
Matie, Woensdae verskyn, word dit in stapels by die ingange van
akademiese geboue en koshuise gelaat vir studente om tydsaam op te tel.
Maar
toe Annelize Kloppers, redakteur van die afgelope week se uitgawe,
Woensdag op pad klas toe na ’n eksemplaar van dié uitgawe soek, was
almal reeds opgeraap.
“Die interessantste was om die reaksie van
mense te sien as hulle die koerant optel. Van die mense het my gevra:
‘Wat het jy gedink!?’
“Daar was ook mense wat die foto uitgeskeur het voordat hulle die koerant gelees het of dit met merkpenne doodgekrap het.”
En die foto wat die studente so aan die gons het?
Daar
– op die voorblad – gee twee bronstige jong kêrels mekaar ’n nat soen
as deel van die kampus se jaarlikse Soen in die Laan-geleentheid.
Studente
– sommige geesdriftig en positief, ander negatief – vlieg mekaar op
Facebook-forums in oor dié foto. Die redakteur word oorval deur mense
wat haar om die beurt gelukwens of skel. Sommige lesers het arms vol
koerante opgetel (hoewel niemand weet wat hulle daarmee wou doen nie).
En die Lesbigay-vereniging op die kampus, wat dié twee mansvryers na
die geleentheid aangery het, het sommer 60 lede bygekry danksy die
publisiteit. Selfs uit die Vrystaat kry die koerant terugvoer.
“Dis die grootste reaksie wat ek nog gekry het,” vertel Kloppers.
“Dis ons beste uitgawe die afgelope vier jaar,” sê Vanessa Smeets, die fotograaf wat dié kus vasgelê het.
Soen in die Laan is ’n jaarlikse geleentheid waarop gekyk word hoeveel paartjies gelyk langs die Eersterivier kan vry.
Vanjaar
wou hulle saamgaan, vertel Robert Milano, voorsitter van Lesbigay.
“Gewoonlik voel ons lede te geïntimideer om deel te neem, so toe nooi
ons mense van die Universiteit van Kaapstad en Wes-Kaapland oor om as
’n groep saam te gaan.
“Ons het eers by ’n pub byeengekom om
mekaar te ontmoet en sodat elkeen ’n soen-partner kon kry. En toe is
ons Laan toe,” sê Milano.
“Die ander studente in Die Laan het nie
regtig die Lesbigay-soeners opgelet nie,” vertel Smeets. “Hulle was
self te veel in die oomblik vasgevang.”
Sy het eintlik gehoop
Die Matie sou ’n ander foto gebruik waarop twee mansstudente –
onderskeidelik wit en bruin – mekaar soen, maar dit het toe nie gebeur
nie.
Een ding waaroor niemand in Stellenbosch veel gesels nie,
is die identiteit van die twee knape op die voorbladfoto. Dit word in
die onderskrif verswyg.
Rapport het egter een van hulle, Bjorn
Czepan, in Kaapstad opgespoor. Hy is ’n Duitse student wat aan die
Universiteit van Kaapstad studeer en die Eikestad vir die geleentheid
besoek het.
Hy weet nie hoekom almal so ’n bohaai opskop nie. “Dit
was ’n baie lekker soen – beslis die moeite werd om voor Stellenbosch
toe te ry.”
- Rapport