Matie in tref-en-trap-ongeluk
2012-01-24 09:00
Stellenbosch – ’n Saak van roekelose en nalatige bestuur word ondersoek nadat ’n Matie-student Saterdag omstreeks 17:15 voor die poskantoor hier raakgery is.
Die bestuurder van ’n groen Honda Civic het weggejaag en is nog soek.
Die beseerde voetganger, ’n inwoner van die studentewoonstelkompleks Huis MacDonald, is met kopbeserings en ’n gebreekte sleutelbeen in die Stellenbosch Mediclinic opgeneem.
Sy word steeds daar behandel, het René Matthee, polisiewoordvoerder, gesê.
Enigiemand wat meer inligting oor die tref-en-trap-voorval het, kan die ondersoekbeampte in die saak, speursers. Denver Alexander, by 072 363 0013 bel.
Volg Nuus24 op Twitter
- Die Burger