Masjiene af ná seun breindood is
2009-12-11 08:23
Carina van Wyk
Johannesburg - Die gr. 11-leerling van Helpmekaar Kollege in Johannesburg wat die naweek in ’n motorongeluk beseer is, is eergister omstreeks 17:40 dood.
Volgens Jakes van den Berg van Kempton Park het die familie besluit om die masjiene wat sy seun, Estan (17), aan die lewe gehou het, af te skakel nadat hy deur die loop van die oggend breindood verklaar is.
“Dis maar swaar. Ek is ongelooflik kalm, maar dit sal my later vang.”
Estan het ernstige kopbeserings opgedoen in die botsing wat Saterdag omstreeks 21:45 naby die Witweg-afrit op die N17 in Springs gebeur het. Hy het saam met ’n vriend van Alberton Springs toe gegaan.
Verskeie van sy organe is beskadig en sy bekkenbeen is gebreek.
Estan is per helikopter na die Charlotte Maxeke-hospitaal geneem nadat nooddienste sowat twee uur lank gesukkel het om hom uit die wrak te kry, het Van den Berg sr. gesê. Estan, ’n kranige rugbyspeler wat al vir sy skool se eerste span uitgedraf het, is Sondag omstreeks 10:00 na die Milpark-hospitaal oorgeplaas en was in die waaksaal tot sy dood.
Volgens Van den Berg sr. is Estan se dood veral “baie swaar” vir sy broer, Jakes (18), wat saam met hom in gr. 11 is.
“Hy (Estan) het ongelooflik maklik met mense oor die weg gekom,” het hy gesê.
Volgens kapt. Johannes Ramphora, Springs-polisiewoordvoerder, is twee insittendes in die ander motor ook ernstig beseer. Die oorsaak van die ongeluk word nog ondersoek.
* Estan word Maandag 11:00 vanuit die AGS Woord en Lewe-kerk in Sunwardpark, Boksburg, begrawe.
- Beeld