Masjien draai man se arm vas
2010-09-02 15:56
Durban – ‘n Man is Donderdag beseer toe sy arm vasgevang is in ‘n masjien by ‘n fabriek in Langeberg-weg in Durban, het paramedici in KwaZulu-Natal gesê.
“Die man het blykbaar die masjien gebruik om staaldromme in plastiek toe te draai toe sy arm in een van die bewegende dele beland het en vasgeknyp is,” het Jeff Wicks, Netcare 911-woordvoerder, gesê.
Na bewering het ander werkers in die fabriek dadelik die krag afgeskakel en die masjien gestop.
“Met paramedici se aankoms op die toneel was die man se arm steeds in die masjien vasgeknyp. Die span nooddienswerkers het spesiale gereedskap gebruik om die man se arm los te kry. Dit was nie nodig om sy arm te amputeer nie,” het Wicks gesê.
Die slagoffer is op die toneel gestabiliseer waarna hy na die hospitaal vervoer is vir verdere mediese behandeling.
Volg Nuus24 op Twitter.
- SAPA