Ma’s voed verkeerde babas in hospitaal
2010-01-28 11:41
Virginia Keppler
Pretoria - Twee pasgebore babas is in die Netcare Femina-hospitaal in Pretoria twee keer aan die verkeerde ma’s gegee om te borsvoed.
Die fout is eers die volgende dag ontdek toe ’n pediater na die een ma is om haar babaseuntjie te ondersoek en ’n babameisie aangetref het.
Dié babas is verlede Donderdag met ’n keisersnee in die lewe gebring. Albei het donker hare.
Die babas het duidelik gemerkte armbande om albei hul hande en een om hul enkels gehad, maar is steeds deur die verpleegsters aan die verkeerde ma’s gegee om te borsvoed.
Die fout is eers die volgende oggend, ná nog ’n voeding, deur die pediater ontdek.
Die hospitaal het nou bykomende maatreëls in plek gesit om foute soos dié in die toekoms uit skakel.
Joey Breedt, hospitaalwoordvoerder, het die voorval as “buitengewoon en totaal onaanvaarbaar” beskryf en het gesê hulle is “bitter spyt oor wat gebeur het”.
Volgens Breedt het die hospitaal reeds die nodige dissiplinêre stappe gedoen. “Ons is in noue kontak met die ouers en het alles in ons vermoë gedoen om vas te stel dat daar geen fisieke skade aan die babas of die ouers aangerig is tydens die voorval nie.”
’n Vrou van Waverley in Pretoria, die seuntjie se ma, het gesê sy was baie ontsteld, maar dat sy en haar man geen regstappe teen die hospitaal gaan doen nie.
“Dit is egter vir ons belangrik dat die hospitaal nie dieselfde fout in die toekoms begaan nie,” het sy gesê.
Sy het gesê sy was in erge pyn en nie by haar volle bewussyn nie toe sy die ander baba gevoed het.
“Ek het gesien my baba het ander klere aan en het gedink hy het dalk die vorige kleertjies vuilgemaak,” het sy gesê.
Volgens haar is albei babas dadelik getoets, veral omdat hulle deur die verkeerde ouers geborsvoed is. Sy het gesê albei babas is gesond en is tuis.
Die meisietjie se ouers is egter baie omgekrap en die pa is blykbaar van plan om regstappe teen die hospitaal te doen.
- Beeld