Marikana: Slagoffers was geboei
2012-11-05 17:06
Video - Marikana-ooggetuies vertel van 'marteling'
Ooggetuies van die Marikana-slagting het voor die Farlam-kommissie getuig dat hulle deur die polisie gemartel is. Kyk hier na 'n video.
KYK
Rustenburg – Van die betogers wat in Augustus in Marikana doodgeskiet is, het glo boeie aan gehad, het die Farlam-kommissie Maandag gehoor.
Dali Mpofu, regsverteenwoordiger van Lonmin-mynwerkers wat by Marikana beseer of in hegtenis geneem is, het kapt. Apollo Mohlaki, 'n misdaadtoneel-kenner, ondervra.
Mohlaki het gesê dat hy nie self gesien het dat van die slagoffers boeie aan gehad het nie, maar hy het toegegee dat dit so lyk op 'n video wat aan die kommissie vertoon is.
“Ek het dit nooit by die misdaadtoneel gesien nie. Ek het nie na individuele lyke gegaan om te kyk wie geboei is en wie beseer is nie,” het Mohlaki gesê.
“As ek na die video kyk, lyk dit of daar iemand is wat moontlik geboei is, maar ek het dit nie op die dag raakgesien nie.”
Altesaam 34 mynwerkers is op 16 Augustus doodgeskiet toe die polisie op hulle losgebrand het tydens gewelddadige betogings buite Lonmin se myn in Marikana.
Die kommissie, wat gelei word deur die afgetrede regter Ian Farlam, is aangestel om die voorval te ondersoek.
Farlam het voor die vertoning van die video aan die families gesê dat die beeldmateriaal baie ontstellend is, en dat hulle die gebou kon verlaat as hulle sou wou.
‘n Gelag kon aan die einde van die video gehoor word, maar dit was nie duidelik wie gelag het nie.
– Volg Nuus24 op Twitter
- SAPA
