Marikana: Polisie praat oor eerste skote

2012-11-09 14:52

Rustenburg – Die skietery wat die lewe van 'n groep mynwerkers by Marikana geëis het, het begin met 'n sarsie skote van agt sekondes lank, het die Farlam-kommissie Vrydag in Rustenburg gehoor.

"Die skietery is gestaak deur die [polisie se] TRS [taktiese reaksiespan], wat kon sien dat dit nie meer nodig was nie," het lt.kol. Duncan Scott gesê.

Hy het beeldmateriaal van verskillende nuusspanne gebruik om sy vertelling te staaf.

Altesaam 34 mense is dood en 78 gewond toe die polisie op 16 Augustus op 'n groep oproerige mynwerkers geskiet het naby Lonmin se platinummyn in Marikana.

"Toe hulle deur die gewapende betogers aangeval is, het die polisiebeamptes begin retireer en na die grond geskiet om die aanvallers af te skrik," het Scott gesê.

Video-opnames wat aan die kommissie vertoon is, het gewys hoe die stakers op die grond neerval. "Hou op skiet! Hou op skiet!" het die polisie ná 'n sarsie geweervuur van agt sekondes geroep.

Scott het vroeër vertel dat die stakers drie maal probeer het om deur die rye polisiebeamptes te breek.

Die polisie het doringdraad uitgerol om hulle ondersteuningspanne en die media te beskerm.

In een van die video-opnames skiet een van die mynwerkers met 'n vuurwapen op die polisie.

Scott het aan die kommissie gesê dat twee pistole later op die toneel by van die stakers gevind is.

Een van die pistole het behoort aan 'n polisieman wat op 13 Augustus beroof en doodgekap is.

– Volg Nuus24 op Twitter.

- SAPA