Marikana: Familielede ly die meeste

2012-08-23 23:02

Johannesburg – Die ma’s, vroue en kinders wat geliefdes verloor het in die Marikana-slagting ly die meeste, het die Gautengse premier, Nomvula Mokonyane, Donderdag gesê.

“Ons moenie vergeet dat êrens in hierdie land sal ‘n vrou nie meer op [daardie] naam genoem word nie... maar sy sal ‘n weduwee genoem word.”

Mokonyane het gepraat by die gedenkdiens in Johannesburg vir die 44 mense wat ‘n week gelede tydens gewelddadige betogings by die Lonmin-platinummyn in Marikana dood is.

Sy sê families se omstandighede her vererger omdat die “karige” salarisse van die mynwerkers waarop hulle staatgemaak het nou weg is.

“Kom ons gee vir hulle vertroosting en ondersteuning, want hulle het ons nodig.”

Die samelewing hanteer weduwees op ‘n anderste en negatiewe wyse. Weduwees word gedwing om klere te dra waaraan hulle nie gewoond is nie en om agter in ‘n taxi te sit, net omdat hul mans dood is, het sy gesê.

“Kom ons neem ‘n oomblik om die pyn wat hierdie ma’s, vroue en kinders in hierdie moeilike tyd deurmaak te voel.”

– Volg Nuus24 op Twitter
 

- SAPA