Marikana: Deskundige gee oorsig oor misdaadtoneel

2012-10-01 18:01

Marikana – 'n Forensiese deskundige het uitgewys waar die lyke van mynwerkers gevind is ná die skietery in Augustus by Lonmin se platinum-myn in Marikana.

'n Groot groep mense het oudregter Ian Farlam en sy span gevolg terwyl hulle die gebied Maandagmiddag besigtig het.

Die deskundige, wie se naam nie onmiddellik bekend was nie, het 'n plek uitgewys waar sewe lyke gevind is. Vyf ander is langs 'n kraal gevind, het hy gesê.

Farlam het die deskundige gevra om die kommissie te wys waar doringdraad gespan was.

Die kommissie is daarna 'n paar honderd meter verder geneem, na waar een lyk gevind is. Die deskundige het gesê die lyk is "in die pad gevind".

Ammunisie van R5-aanvalsgewere en ander vuurwapens is volgens die deskundige in die gebied rondom die berugte klipkoppie gevind waar die polisie glo ten tyde van die skietery gestaan het.

– Volg Nuus24 op Twitter.

- SAPA