Manyi-uitlating bemoeilik verkiesingsveldtog, sê Vavi
2011-03-05 10:51
Durban - Die regerende alliansie se taak in die munisipale verkiesingsveldtog is bemoeilik deur die gewraakte uitlating van Jimmy Manyi, regeringswoordvoerder, dat daar ’n oorkonsentrasie bruin mense in die Wes-Kaap is.
Só het Zwelinzima Vavi, hoofsekretaris van Cosatu, gister hier op ’n konferensie van die South African Clothing and Textile Workers’ Union (Sact-wu) gesê.
Manyi se uitlating vroeër in ’n TV-onderhoud terwyl die ewe omstrede wysigings aan die Wet op Gelyke Indiensneming opgestel is, het die afgelope week groot opslae gemaak.
In reaksie op Manyi se uitlating, wat in sy hoedanigheid as voorsitter van die Black Management Forum gemaak is, het Trevor Manuel, minister in die presidensie, hom in ’n ope brief ’n “rassis in die ergste graad” en “soos H.F. Verwoerd” bestempel.
Manyi se uitspraak sal vrese “wat (die vakbond) Solidariteit valslik aangewakker het” dat ’n miljoen bruin werkers se poste ingevolge beoogde arbeidswetgewing deur swart mense oorgeneem sal word, net verder aanblaas, het Vavi gesê.
Volgens Cosatu probeer Solidariteit en die DA bruin kiesers teen die ANC draai.
Vavi het egter gesê Cosatu en Sactwu is ten volle daartoe verbind om vir ’n wegholoorwinning vir die ANC in plaaslike owerhede oor die land heen te werk.
Hy het gesê Manyi se uitspraak oor bruin mense bots lynreg met die ANC en sy alliansievennote se verbintenis tot ’n nierassige samelewing waarin alle landsburgers se regte beskerm word en hulle met respek behandel word.
Vavi het die ANC se verklaring vandeesweek verwelkom waarin hy hom van Manyi se uitspraak distansieer en waarin gesê is die regering is daartoe verbind om die bruin gemeenskap se belange te beskerm.
- Volg Nuus24 op Twitter.
- Die Burger