‘Manyi se aanval op VF+ sonder substansie’
2011-04-05 18:00
Johannesburg - Die Vryheidsfront Plus (VF+) beskou Jimmy Manyi se aanval op die party en die verdediging van regstellende aksie as substansielose retoriek.
Adv. Anton Alberts, VF Plus-parlementêre woordvoerder oor arbeid, het aangedui dat Manyi se uitsprake dat 350 jaar se diskriminasie nie in 16 jaar reggestel kan word nie, ‘n blyke is van die ANC se moedswillige onkunde aangaande die Afrikaner se geskiedenis in Suid-Afrika.
“Dit is duidelik dat Manyi en die ANC hierdie simplistiese uitsprake maak om die voortsetting van regstellende aksie te regverdig, terwyl dit eintlik verdien om uitgefaseer te word.
“Die ANC kan gerus leer by die werklike geskiedenis oor die Afrikaner se opstaan uit armoede. Die grondslag van die Afrikaner se opheffing na die vernietigende Anglo-Boere-oorlog is gelê voor 1948 toe entrepreneurs begin woeker het met armes se geld en wat gelei het tot die skepping van reuse bedrywe soos Sanlam, Volkskas en Rembrandt (Richemont),” het Alberts gesê.
Die VF+ beskou die ANC se metode om entrepreneurs te skep deur die blote herverspreiding van rykdom deur middel van regstellende aksie en swart ekonomiese bemagtiging as onvolhoubaar en eerder geskoei op sosialistiese denke as ware entrepreneurskap.
Daarom sal die VF+ hierdie beleid altyd aggressief teenstaan. Ware rykdom word geskep deur waarde toe te voeg en nie deur verspreiding van rykdom nie.
Die feit dat Manyi die VF+ persoonlik aanval wys weereens ook dat hy nie bevoeg is om ‘n openbare pos te beklee wat onpartydigheid vereis nie.
Die VF + het ‘n ruk terug Manyi daarom by die Staatsdienskommissie aangekla vir verdere ondersoek.
Volg Nuus24 op Twitter.
- SAPA