Manuel se uitlatings kan nóg woede in ANC ontketen
2011-03-14 08:40
Kaapstad - Vrae oor hoe veilig Trevor Manuel se pos binne die regering is, word opnuut gevra.
Dit kom nadat hy glo omstrede uitlatings gemaak het oor ’n saketransaksie waarby pres. Jacob Zuma se seun betrokke is.
Manuel, minister van beplanning in die presidensie, is verlede week deur die Wall Street Journal aangehaal oor die omstrede Arcelor-Mittal-transaksie, wat hy glo beskryf het as “die lelikste vergestalting van (swart ekonomiese bemagtiging), maar nie die enigste nie”.
Zuma se seun Duduzane, sowel as die Gupta-broers – wat noue bande met die president het – baat heelwat by die omstrede bemagtigingstransaksie, wat al deur onder meer Cosatu gekritiseer is.
Manuel se woordvoerder, Dumisa Jele, het Sondag gesê die minister ontken of bevestig nie dat hy die uitsprake gedoen het nie, maar wil bloot nie kommentaar lewer nie.
Die berig kom te midde van onenigheid in die ANC oor Manuel se ope brief aan die regering se inligtingshoof, Jimmy Manyi, waarin hy hom van rassisme beskuldig.
Dit het ook tot ’n hewige debat op openbare forums gelei.
Verwarring heers oor hoeveel steun Manuel in die ANC geniet ná sy aanval op Manyi.
Die minister in die presidensie, Collins Chabane, sowel as die ANC se sekretaris-generaal, Gwede Mantashe, het hulle verlede week by Manyi geskaar.
Laasgenoemde het gesê verskeie ANC-lede, onder wie Manuel, moet “ophou en dit vermy om op te tree as vrye agente wat as individue praat en uitlatings maak”.
Die Sunday Times het Sondag berig die minister van menslike nedersettings, Tokyo Sexwale, sowel as die oudkabinetslid dr. Pallo Jordan het Manuel die naweek verdedig op ’n vergadering van die nasionale uitvoerende komitee van die ANC.
- Die Burger