Manuel ontken berig oor samesprekings
2011-09-06 09:04
Kaapstad – Trevor Manuel, beplanningsminister in die presidensie, het Maandag heftig ontken dat hy ooit samesprekings met Helen Zille, DA-leier, gevoer het oor die moontlikheid om ’n DA-lid te word.
“Nee, nee, nee. Dit is absolute snert. Dit is een mens se mening, nie myne nie.
“Ek was nog nooit by enige gesprekke hieroor betrokke nie,” het ’n duidelik ontstelde Manuel Maandag buite die parlement gesê.
Hy het ’n berig wat Maandag in Volksblad verskyn het oor pogings om hom na die DA te lok, as onwaar afgemaak.
“Ek gaan nie toelaat dat jy dié goed in jou kop kry nie,” het hy verder stoom afgeblaas.
Manuel het verwys na die berig waarvolgens Athol Trollip, parlementêre leier van die DA, in Februarie verlede jaar aan Donald Gips, Amerikaanse ambassadeur in Suid-Afrika, laat blyk het dat Zille bereid was om as leier terug te staan as Manuel sou besluit om die “skip te verlaat”. Gips het dit in ’n vertroulike boodskap aan sy regering genoem, en dié boodskap is aan Wiki-Leaks uitgelek.
Manuel het nie op die DA se toenadering gereageer nie.
Trollip het ook gesê dat Manuel – die skerpste brein in die ANC – nie tevrede is in dié party nie.
Zille het in reaksie aangedui dat die DA deurgaans probeer kontak maak met belowende mense wat die opposisie teen die ANC se vergrype kan versterk. Sy het ook genoem dat sulke kontak uiteraard weens die sensitiewe aard daarvan vertroulik moet wees.
Manuel het gesê: “Ek sal nooit ooit weer kommentaar op dié bewerings lewer nie.”
Volg Nuus24 op Twitter.
- Volksblad