Manuel: 'Malema moet ook deursigtig wees'
2011-10-08 12:30
Johannesburg – Trevor Manuel, minister in die presidensie, meen alle individue met mag oor politieke prosesse moet oop wees vir betragting van die publiek, insluitende die leier van die ANC-jeugliga, Julius Malema, het ‘n berig Saterdag gelui.
Manuel het Vrydag aan die Britse kanaal Channel 4 gesê dat amptenare deursigtig moet wees oor hul finansies.
Op ‘n vraag oor of dit op Malema van toepassing is, het Manuel geantwoord: “Ek dink wel dat hy [deursigtig moet wees], ek dink almal van ons wat ‘n invloed het oor politieke prosesse moet oop wees vir nadere ondersoeke.”
Manuel se kommentaar volg op verskeie aantygings van korrupsie en tenderbedrog wat verband hou met die jeugliga se president.
Malema sal na verwagting Donderdag ‘n dissiplinêre verhoor deur die ANC bywoon op aanklagte dat hy die ANC se naam deur die modder gesleep het en dat hy verdeeldheid saai in die ANC.
Hy het onlangs gesê die ANC-jeugliga sal ‘n span na Botswana stuur om die plaaslike opposisiepartye te konsolideer en om magsveranderinge aan te bring.
Die jeugliga se woordvoerder Floyd Shivanbu, adjunk-president Ronald Lamola, tessourier-generaal Pule Mabe, sekretaris-generaal Sindiso Magaqa en adjunk-sekretaris-generaal Kenetswe Mosenogi word saam met hom aangekla.
Sy verhoor is na 15 Oktober uitgestel nadat hy siek geword het en gehospitaliseer is.
Malema is Woensdag in die hospitaal opgeneem met griepsimptome.
“Hy is vanoggend ontslaan,” het die woordvoerder vir die Limpopo Medi-Clinic, Istha McMillan, Saterdag gesê.
– Volg Nuus24 op Twitter
- SAPA