Manto in hospitaal vir ’n ondersoek
2009-11-19 07:53
Antoinette Pienaar
Johannesburg - Dr. Manto Tshabalala-Msimang, voorheen minister van gesondheid, is Dinsdag by die Wits Donald Gordon mediese sentrum vir ’n mediese ondersoek opgeneem.
Vernon Kinnear, woordvoerder van die sentrum, het gesê sy sal waarskynlik oornag bly, maar die ondersoek het niks met haar leweroorplanting te doen nie.
Tshabalala-Msimang (68) het op 14 Maart 2007 in dié sentrum ’n leweroorplanting ondergaan.
Volgens Kinnear verkies die spesialiste wat dié soort oorplantings doen dat hul pasiënte ná ’n oorplanting na hulle terugkeer as hulle siek word. “Hulle benodig spesiale behandeling weens die groter risiko vir infeksies.”
Ontvangers van skenkerorgane neem medisyne wat hul immuunstelsels onderdruk om te keer dat hul liggame die organe verwerp.
Beeld het betroubaar verneem Tshabalala-Msimang is opgeneem omdat daar vermoed is sy het ’n geperforeerde derm. Onder meer ’n gastroënteroloog sal haar ondersoek.
Tshabalala-Msimang het destyds lewerversaking gekry weens outo-immune hepatitis (OIH).
OIH kom voor wanneer die liggaam ’n komponent van die lewerselle as vreemd beskou. Die immuunrespons wat volg, lei daartoe dat lewerselle oor jare vernietig word.
- Beeld