Mantashe betreur 'Mangaung-manipulering'
2012-12-11 17:50
Johannesburg – Sektore van die samelewing probeer die uitkoms van die ANC se nasionale konferensie manipuleer, het Gwede Mantashe, sekretaris-generaal van die ANC, gesê.
"Ons sien dit as 'n waarskuwing wat aan die ANC gerig is," het Mantashe aan joernaliste by Luthuli-huis in Johannesburg gesê.
"Sektore van die samelewing soek 'n spesifieke uitkoms."
Mantashe het kommentaar gelewer op berigte dat geloofsleiers 'n brief aan pres. Jacob Zuma geskryf het, waarin hulle waarsku dat die publiek bekommerd is dat Suid-Afrika sy morele kompas verloor het.
In die brief sê kerkleiers "ons demokrasie kan aansienlik verbeter word".
Die brief is onderteken deur aartsbiskop Thabo Makgoba van die Anglikaanse kerk, biskop Joe Seoka van die Suid-Afrikaanse Raad van Kerke, eerw. Moss Ntlha van Teasa, ’n evangeliese kerkorganisasie met drie miljoen lidmate, en eerw. Edwin Arrison van Kairos.
"Hulle [Suid-Afrikaners] hunker na verandering na – nie oppervlakkige verandering van een selfverrykende leier na ’n ander nie, of een politieke party na ’n ander nie, maar verandering na ’n kultuur waarin leiers verantwoordbaar teenoor die mense is."
Afskrifte van die brief is aan politieke en ekonomiese leiers, insluitend, Helen Zille, DA-leier, gestuur.
Die presidensie het bevestig dat Zuma die brief gesien het.
Mantashe het verder gesê die regerende party gaan nie toelaat dat enige sektor die ANC se beleid skryf nie.
"Dit is 'n kwessie van beginsel."
Hy het gesê die deursettingsvermoë van die party se leierskap moet deur alle sektore respekteer word.
"Die ANC moet toegelaat word om sy besigheid te bestuur."
– Volg Nuus24 op Twitter
- SAPA
