Mans wat vrou by brug afgooi vandag gevonnis
2009-11-20 11:46
Johannesburg - Twee van die vier mans wat 'n Durbanse onderwyser beroof en daarna by 'n brug afgegooi het, word Vrydag in die Durbanse streekhof gevonnis.
Wandile Sibande (20) en Sibusiso Dlamini (25) het skuldig gepleit op aanklagte van roof met verswarende omstandighede en ontvoering, het The Star Vrydag berig.
Net Dlamini het skuldig gepleit op 'n aanklag van poging tot moord op Kavisha Seevnarian.
Nsibande was nie teenwoordig toe Seevnarian by die brug afgegooi is nie.
'n Derde verdagte, 'n tiener, verskyn op 24 November in die hof. Die ander is nog op vrye voet.
Jeewan Seevnarian, Kavisha se pa, is gevra om ter verswaring van die vonnis te getuig.
"My dogter het gepleit terwyl sy aan die relings [van die Umkomaas-rivier-brug] vasgehou het. Sy het gepleit dat hulle haar lewe spaar, maar sy was geskop en getrap dat sy moes los," het hy gesê.
Kavisha se motor is verlede Vrydagaand deur die mans by 'n verkeerskruising in Shallcross gekaap.
Die mans het haar toe in 'n ander motor gelaai en na Umlazi gery waar die mans haar bankkaart gebruik het om geld by 'n OTM te trek. Sy is toe na die Umkomaas-rivier-brug geneem en afgegooi.
Sy het die 60 m val oorleef en sterk aan in die hospitaal. Sy het beserings aan haar ruggraat opgedoen en haar pelvis is gebreek.
Ter versagting van vonnis het die regsverteenwoordiger Aslam Shaikjee gesê Nsibande, 'n matriekleerder aan die Eshowe Sekondêre Skool, sê "hy walg homself".
"Hy is vernederd oor sy aksies en wil die slagoffer en haar gesin om verskoning vra."
Dlamini wou ook om verskoning vra en is "baie berouvol".
Op die vraag of hy die verskonings sal aanvaar, het Seevnarian gesê: "In die stadium is ons nie in 'n posisie om dit te doen nie".
– Sapa