Mans verkrag vrou glo herhaaldelik
2010-07-26 23:26
Bloemfontein – Die polisie in die Vrystaat het sewe mans Maandag in hegtenis geneem vir die verkragting van ‘n vrou by die berugte G-hostel in Thabong, Welkom.
Volgens ao. Malebo Khosana, polisiewoordvoerder, het die 39-jarige vrou en twee vriende na ‘n naby geleë kuierplek geloop om bier te koop toe hul deur ‘n groep mans voorgekeer is.
Na bewering het die voorval omstreeks 03:00 Maandagoggend plaasgevind en het die verdagtes messe in hul besit gehad.
Die mans het glo een van die vroue na ‘n kamer in die G-hostel geneem en haar herhaaldelik verkrag. Hulle het gedreig om haar dood te maak sou sy enige geluid maak.
Sy is later deur ‘n man gered wat gemaak het asof hy haar ook wou verkrag. Die man het die slagoffer glo gehelp om deur ‘n badkamervenster te ontsnap.
Volgens die vrou het die mans ook haar ring en selfoon gesteel.
Die sewe verdagtes, tussen die ouderdomme van 25 en 35, is in hegtenis geneem. Hulle sal binnekort in die hof verskyn.
Die polisie is steeds op soek na verskeie ander mans wat ook met die daad verbind kan word.
Volg Nuus24 op Twitter.
- SAPA