Mans vas oor handgranaat, vuurwapens

2013-01-07 10:32

Johannesburg – Twee mans sal binnekort in New Brighton, Oos-Kaap, se landdroshof verskyn nadat ‘n handgranaat en vuurwapens in hul besit gevind is.

Ao. Dumile Gwavu sê die mans – 18 en 22 jaar oud – is verlede week in hegtenis geneem nadat ‘n taxibestuurder en sy passasier beroof is.

“Hulle het met ‘n onbekende hoeveelheid geld en ‘n selfoon weggekom...”

Gwavu sê polisiebeamptes het later die beskuldigdes by ‘n huis gevind.

“Die huis van die 18-jarige man is deursoek en ‘n handgranaat, twee vuurwapens... en vyf patrone is gevind.”

Die mans sal teregstaan op aanklagte van gewapende roof, besit van ‘n ongelisensieerde vuurwapen en ammunisie en die onwettige besit van plofbare toestelle.

Volg Nuus24 op Twitter

- SAPA