Mans vas met vervalste betaalstrokies, ID-boekies
2011-08-13 13:58
Johannesburg – Twee mans is in Oos-Londen op aanklagte van bedrog in hegtenis geneem ná identiteitsdokumente en vervalste betaalstrokies in hulle besit gevind is, het die Oos-Kaapse polisie Saterdag gesê.
Volgens lt.kol. Mtati Tana is die mans Donderdag in Oxford-straat aangekeer. Die polisie het ook vervalste versekeringsdokumente en bankkaarte in hulle besit gevind.
Tana sê daar is ook op onder andere selfone, rekenaars, en fotostaatmasjiene beslag gelê.
Die polisie vermoed die mans het die foto's op oorspronklike identiteitsdokumente met hul eie vervang om lenings van finansiële instellings te bekom, het Tana gesê.
Die mans sal Maandag in die Oos-Londen-landdroshof verskyn.
– Volg Nuus24 op Twitter.
- SAPA