Mans met kinders in kattebak op grens vasgetrek

2013-01-16 10:13

Johannesburg – Twee Somaliese mans is in Zeerust in die Noordwes in hegtenis geneem nadat hulle na bewering probeer het om ses kinders en ‘n vrou na Suid-Afrika te smokkel.

Brig. Thulani Ngubane sê die Valke het die mans Maandag omstreeks 21:30 by die Swartkop-grenspos vasgetrek.

“Die twee mans is by die grenspos gevind toe hulle Suid-Afrika onwettiglik vanaf Botswana saam met ses kinders en ‘n vrou binnegegaan het,” het die woordvoerder gesê.

Ngubane sê ‘n vier maande oue seun, vierjarige tweelingseuns, twee tienjarige meisies en ‘n 14-jarige seun is in die mans se motor gevind. Twee van die kinders is in die kattebak gevind.

Die vrou beweer sy is die baba se ma.

Die kinders is volgens die woordvoerder na ‘n veilige plek geneem terwyl die saak ondersoek word.

Die mans sal Woensdag in die Zeerust-landdroshof verskyn.

Volg Nuus24 op Twitter

- SAPA