Mans in sop ná hulle duisende rande se bier steel

2012-08-31 21:51

Johannesburg – Drie mans is in hegtenis geneem nadat polisiebeamptes hulle met gesteelde biere ter waarde van R200 000 betrap het, het die polisie gesê.

Lt.kol. Katlego Mogale sê die mans – 18, 25 en 28 jaar oud – is Vrydagoggend aangekeer nadat die polisie persele in Hillbrow deursoek het. Dit blyk dat die drank die vorige aand uit ‘n gekaapte vragmotor gelaai is.

“Die polisie het drie mans by die perseel asook die gesteelde bier gevind,” het Mogale gesê.

Mogale sê drie mans het Donderdagaand ‘n vragmotor, wat bier vervoer het, gekaap. Die verdagtes het na bewering die insittendes van die voertuig vasgebind voordat hulle na die agterkant van die vragmotor geskuif is.

“Die drie mans het toe na die perseel in Hillbrow gery, waar hulle die bemanningslede geforseer het om te drink terwyl hulle die bier uitgelaai het.”

Mogale sê die vragmotor en bemanningslede is later in Jeppe agtergelaat.

Die verdagtes sal binnekort in die Hillbrow-landdroshof verskyn.

Volg Nuus24 op Twitter

- SAPA