Mans in polisie-uniforms beroof winkel
2012-02-02 21:57
Johannesburg – Die polisie in Limpopo het ‘n interne ondersoek van stapel gestuur nadat mans in polisie-uniforms ‘n kruidenierswinkel in Tohoyandou beroof het, het die polisie Donderdag gesê.
Volgens brig. Lindela Mashigo toon kringtelevisie-beeldmateriaal, wat deur die SABC in die hande gekry is, hoe gewapende rowers in polisie-uniforms die plaaslike Cash and Carry op 27 Januarie beroof het.
“Ons neem dit baie ernstig op en sal ‘n kopie van daardie beeldmateriaal kry sodat ons gesigte kan vergroot en kan kyk of ons enige van die rowers kan identifiseer,” het hy gesê.
Foto’s wat uit die beeldmateriaal gehaal is, sal na alle polisiekantore in die streek gesirkuleer word.
Indien die mans nie polisiebeamptes is nie, sal hulle deur die plaaslike gemeenskap geïdentifiseer word, het Mashigo gesê.
“Ons het al situasies gehad waar polisiebeamptes by misdaad betrokke was,” het hy gesê. “Ons sal hulle uithaal en die reg sy gang laat gaan.”
- Volg Nuus24 op Twitter
- SAPA