Mans beroof Pick n Pay, beampte geskiet

2012-12-05 18:03

Johannesburg – 'n Johannesburgse metropolisiebeampte is op die N12-hoofweg deur rowers geskiet en gewond, het Wayne Minnaar, polisiewoordvoerder, Woensdag gesê.

Minnaar het gesê die polisieman is in sy regterskouer en nek gewond.

Hy het gesê twee polisiebeamptes het probeer om 'n blou stasiewa vir nalatige bestuur op die N12 net voor die Soweto-afrit af te trek.

"Die verdagtes in die stasiewa het toe uitgeklim en op die beamptes begin skiet."

Minnaar het gesê die mans in die voertuig – dit is nie bekend hoeveel insittendes daar was nie – was met R5-gewere, AK-47-aanvalsgewere en 9 mm-pistole gewapen.

Patroondoppies is later op die toneel gevind.

Hy het gesê die mans het 'n Pick n Pay-winkel in Steeledale in die suide van Johannesburg beroof, enkele minute voor die skietery plaasgevind het.

Niemand is nog in hegtenis geneem nie en die polisie soek steeds na die stasiewa.

Volg Nuus24 op Twitter.

       

- SAPA