Madonsela: Bewerings is ongegrond
2011-07-06 12:45
Kaapstad – Adv. Thuli Madonsela, Openbare Beskermer, het op 'n mediakonferensie gesê die bewerings van korrupsie en bedrog wat teen haar gemaak is, is "ongegrond, onwaar en lasterlik".
Sy het gesê daar bestaan nie 'n dokument waarin sy van dié misdrywe beskuldig is nie.
"Ek het vanaf 2003 tot 2007 persoonlik die maatskappy bestuur." Madonsela is die eienaar van Waweth Law and Policy Research Agency.
Sy het gesê sy het op 7 Mei 2007 by die Suid-Afrikaanse Wethervormingskommissie (SALRC) aangesluit en dat haar maatskappy werk vir die SALRC gedoen het.
"Ek het vasgestel dat iemand wat onderduims is, teruggegaan het na 'n tydperk toe my maatskappy 'n paar kontrakte met die departement van justisie gehad het."
Sy het gesê daar is minstens drie kontrakte wat "baie klein" is.
Twee van dié kontrakte was vir boekverkope van onderskeidelik R30 000 en R7 000. Die ander kontrak was vir die ontwerp van 'n boekomslag vir R3 000.
"Die bewerings van kontrakte van R1,8 miljoen is lasterlik en heeltemal ongegrond."
"Die tydsberekening van die verslag maak die bewerings nog meer verdag. Die berigte wil my en my kantoor se aandag aflei van die werk wat ons doen."
The Star het Woensdag berig dat Madonsela haar glo skuldig gemaak het aan bedrog en korrupsie terwyl sy werksaam was by die SALRC.
Volgens "onafhanklike bronne" het Madonsela se maatskappy glo werk vir die SALRC gedoen en is R1,8 miljoen betaal terwyl sy drie jaar gelede daar gewerk het.
– Volg Nuus24 op Twitter