Mandela wys ons die pad, sê Zille
2011-04-27 06:41
Pretoria - ANC- en DA-ondersteuners het mekaar gister in Mamelodi, oos van Pretoria, onder die wakende oog van die polisie uitgejou waar Helen Zille, DA-leier, ’n byeenkoms toegespreek het.
Zille en verskeie DA-afgevaardigdes, onder andere Brandon Topham, die party se burgemeesterskandidaat in Tshwane, het aan die vooraand van Vryheidsdag ’n paar honderd ondersteuners op Solomon Mahlangu-plein toegespreek.
Die polisie het toegesien dat ’n groepie ANC-ondersteuners nie die byeenkoms ontwrig nie.
Dié ondersteuners het ná die byeenkoms hul eie saamtrek by Mahlangu se standbeeld gehou waar hulle gedreunsing het dat hy (Mahlangu) aan die ANC behoort.
Zille het oor Suid-Afrikaners en hul vryheid gepraat en gesê apartheid het nie net sommige nie, maar almal verneder.
Op Vryheidsdag word die helde en heldinne onthou wat die onmenslikheid van verdrukking beveg het, het sy gesê.
Dis mense soos Albert Luthuli, Mohandas Gandhi, Nelson Mandela, Oliver Tambo, Walter Sisulu, Alan Paton, Helen Suzman, Chris Hani en baie ander.
Volgens Zille kan niemand van vryheid praat terwyl soveel mense in armoede gedompel en sonder hoop is nie.
Sy het na die emosionele erfenis van apartheid verwys en gesê elke mens dra die letsels daarvan.
Mense kan nie gevoelens van gekrenktheid, swak selfbeeld, vernedering, skuld en ontkenning deur konfrontasie of in die howe oorkom nie, het die DA-leier gesê.
Volgens Zille is daar by alle Suid-Afrikaners ’n hunkering om gesien, gehoor en verstaan te word.
“Nelson Mandela het ons die pad vorentoe gewys.
“Versoening vra moed en vrygewigheid.
“Ons het dié pad ’n bietjie byster geraak. Laat ander maar verdeel, ons moet verenig.”
Elke Suid-Afrikaner het die reg om vir die party van sy keuse te stem, het sy gesê.
“As jy kies om die DA te ondersteun, kies jy dat die stryd vir waardigheid, geleenthede en versoening voortgesit word.”
Verskeie ondersteuners het gesê hulle het vertroue in Zille en glo dat sy verandering in mense se lewens kan bring.
Peggy Rasaroka (22) het gesê: “Ek hoop dat die DA sal help om my lewe te verbeter, want nou sit ek net by die huis.”
“Ek wil ’n werk en ’n beter lewe hê. My hoop is op die DA,” het me. Dimakatso Mashike (23) gesê.
Themba Mabela (43) het gesê: “Die ANC het ’n klomp goed belowe soos beter onderwys vir my kinders. Ons het niks daarvan gesien nie. Ons het nie water, paaie of werk nie. Ek het niks en al wat ek by die ANC sien, is korrupsie.”
Volg Nuus24 op Twitter.
- Beeld