Mandela uit die hospitaal ontslaan

2012-12-27 07:40

Johannesburg – Oudpres. Nelson Mandela is Woensdagaand uit die hospitaal ontslaan, het die presidensie gesê.

"Hy sal by sy huis in Houghton versorg word tot hy volkome herstel het," het  Mac Maharaj, presidensiële woordvoerder, gesê.

"Ons bedank die publiek en die media vir die goeie wense en dat hulle Madiba en die familie die nodige privaatheid gegun het.

"Ons versoek dat hul privaatheid steeds gerespekteer word om die beste moontlike toestande vir 'n volkome herstel te verseker."

Die 94-jarige Mandela het Kersdag in die hospitaal deurgebring nadat hy vanaf Qunu in die Oos-Kaap na 'n Pretoriase hospitaal geneem is.

Hy is behandel vir 'n herhalende longinfeksie en galstene.

Dit is die langste wat die voormalige president in die hospitaal behandel word sedert hy meer as twee dekades gelede uit die tronk vrygelaat is.

Pres. Jacob Zuma het Dinsdag in 'n verklaring gesê Mandela "lyk baie beter" en is in goeie gees.

Zuma, Graca Machel, Mandela se vrou, en ander familielede het Mandela op Kersdag in die hospitaal besoek.

– Volg Nuus24 op Twitter

- SAPA