Mandela se kleinseun in hof oor onderhoudsgeld
2011-10-27 13:30
Johannesburg – Die kleinseun van oudpres. Nelson Mandela is in 'n hofgeding gewikkel nadat hy versuim het om onderhoudsgeld aan sy vervreemde vrou te betaal, berig The Times.
Mandla Mandela, die Leeu van Mvezo, het versuim om ingevolge 'n hofbevel R20 000 in regskostes en maandelikse onderhoud aan Tando Mabunu-Mandela te betaal.
Die Mthatha-hooggeregshof het in Junie vanjaar beslis dat daar beslag gelê word op eiendom ter waarde van R100 000.
Pogings om beslag te lê op die eiendom was onsuksesvol.
Volgens die berig het die balju Ncedile Ntsibantu gesê 'n uitvoeringslasbrief is Maandag uitgevoer, maar ná 'n soektog is geen eiendom geneem nie.
Wesley Hayes, Mabuna-Mandela se prokureur, het gesê hy en sy kliënt sal alternatiewe maniere vind om te verseker Mandela betaal.
"Dalk nadat hy al ons opsies oorweeg het, sal ons beslag lê op sy salaris van die parlement of moontlik ander inkomste."
Die helfte van die geld in Mandela se bankrekeninge hangende die finalisering van die egskeiding. Sy huwelik aan 'n vrou van Reunion, saam met wie hy 'n babaseun het, is ook nietig verklaar.
– Volg Nuus24 op Twitter
- SAPA