Mandela se kantoor kap inligtingswet

2011-11-22 13:46

Johannesburg – Vier veranderinge kan die omstrede Wetsontwerp op die Beskerming van Staatsinligting regmaak, het die Nelson Mandela-sentrum van Herinnering Dinsdag gesê.

Dít kan gedoen word sonder om die fundamentele beginsels van die wetsontwerp te verander, het die sentrum in 'n verklaring gesê.

"Die voorstelle is gemotiveer deur die bekommernis dat sommige aspekte van die wetsontwerp ongrondwetlik is."

Indien die wetsontwerp om 14:00 Dinsdagmiddag deur die Nasionale Vergadering aanvaar word, word dit na die Nasionale Raad van Provinsies (NRP) verwys. Die NRP kan op sy beurt wysigings voorstel waarna dit weer voor die NV moet dien.

Die sentrum het gesê daar is nog tyd om die foute reg te maak. Hy het gesê die doel sal wees om te verseker dat die wetsontwerp voldoen aan grondwetlikheid en doelstellings vir vryheid van inligting en uitdrukking, terwyl dit terselfdertyd staatsgeheime kan beskerm.

"Baie is bereik, maar die wetsontwerp is nog nie op 'n punt waar daar gesê kan word dit voldoen aan die bogenoemde standaarde en doelstellings nie."

Die voorstelle wat gemaak is, is om:

* gedeeltes van die wetsontwerp, wat versoek dat geklassifiseerde inligting in terme van die Wet op die Bevordering van Toegang tot Inligting (PAIA) gehanteer moet word, heringestel word;

* die bewoording van die oortredings te heformuleer om te fokus op die skade wat gedoen is;

* die tersydestelling van openbare belang te heformuleer;

* weer die argivering- en outomatiese deklassifikasie-maatreëls van die 2008-weergawe van die wetsontwerp in te stel, aangesien die reëls vir outomatiese deklassifikasie van ouer geheime inligting onnodig streng was.

– Wat dink jy oor dié omstrede wetsontwerp? Is daar rede tot kommer oor mediavryheid in Suid-Afrika? Stuur jou geskrewe bydrae na [e-mail] vir publikasie.

– Is jy by 'n Swart Dinsdag-betoging? Stuur jou foto's na [e-mail].

– Volg Nuus24 op Twitter

- SAPA