Mandela se hartseer voor Wêreldbeker
2010-06-12 07:35
Verslagspan: André Damons, Lizel Steenkamp en Sap
Die Burger
Johannesburg - Oudpres. Nelson Mandela “vaar goed onder omstandighede” nadat sy agterkleindogter Vyrdagoggend vroeg tragies dood is.
’n Familielid wat die ongeluksmotor bestuur het waarin sy dood is, is van strafbare manslag en dronkbestuur aangekla, maar die saak is gister van die hofrol geskrap sodat dit eers verder ondersoek kan word.
Zenani Mandela het Woensdag 13 jaar oud geword.
Die oudpresident “vaar goed onder omstandighede” nadat hy van haar dood gehoor het, het Sello Hatang, woordvoerder van die Nelson Mandela-stigting, gesê.
Die stigting het vroeër die dag gesê Madiba sou nie die openingseremonie en die wedstryd tussen Bafana Bafana en Mexiko in Soccer City bywoon nie omdat dit onvanpas sou wees.
Zenani, een van Mandela se nege agterkleinkinders, was vroeër die aand saam met onder andere Zoleka Seakamela, haar ma, en Winnie Madikizela-Mandela by die WB 2010 afskopkonsert by die Orlando-stadion in Soweto. Sy het na bewering in ’n ander motor as haar ouers gery.
Shakira en die Black Eyed Peas was glo van Zenani se gunsteling-kunstenaars.
Vroeë gerugte dat Madikizela- Mandela en Seakamela ook in die motor was, is Vrydag deur Hatang ontken.
Volgens Hatang was Zenani omstreeks 00:45 saam met twee ander familielede in die motor onderweg huis toe toe die ongeluk gebeur het.
Brig. Govindsamy Mariemuthoo, polisiewoordvoerder, het gesê die bestuurder is kort ná die ongeluk in hegtenis geneem. Hy sou gister in die hof verskyn het.
Madikizela-Mandela is verbysterd oor Zenani, haar oogappel, se dood, berig Jan-Jan Joubert.
Madikizela-Mandela is na die Morningside-Medi-Clinic geneem waar sy vir skok behandel is nadat sy die nuus ontvang het. Zenani is die kleindogter van haar en Madiba se dogter Zindzi.
Seakamela is platgeslaan, het Vuyisile Mafalala, ’n woordvoerder, gesê.
Boodskappe van medelye het reeds vroegdag ingestroom. Pres. Jacob Zuma het namens die regering sy simpatie teenoor die Mandela-familie betuig.
“Die nasie is saam met julle in rou, veral op dié dag waarop ons drome en hoop verwesenlik word met die opening van die eerste Wêreldbeker-sokkertoernooi in Afrika” lui ’n verklaring.
Die ANC en sy twee alliansievennote, die SAKP en die vakverbond Cosatu, het hul skok en hartseer oor die verlies en hul medelye teenoor Seakamela uitgespreek. Ook opposisiepartye het die familie sterkte toegewens.
Mnr. Sepp Blatter, Fifa-president, en die plaaslike reëlingskomitee het ook hul medelye aan die familie gestuur.
- Die Burger