Mandela ondergaan nóg toetse

2012-12-10 17:50

Johannesburg – Oudpres. Nelson Mandela sal Maandag nóg toetse ondergaan en daarna sal dokters besluit wanneer hy ontslaan word, het Nosiviwe Mapisa-Nqakula, minister van verdediging, aan Eyewitness News gesê.

Die presidensie het ook Maandag 'n verklaring uitgereik oor Mandela se gesondheid.

"President Nelson Mandela het 'n goeie nagrus gehad," het Mac Maharaj, presidensiële woordvoerder, gesê.

"Hy is in goeie hande."

Die 94-jarige Mandela is Saterdag in die 1 Militêre Hospitaal  opgeneem vir wat Maharaj beskryf het as toetse wat normaal is vir iemand van sy ouderdom.

Dis die tweede keer vanjaar wat Mandela in 'n hospitaal opgeneem is.

Pres. Jacob Zuma het Mandela Sondagoggend in die hospitaal besoek.

Maharaj het gesê die presidensie bedank die publiek vir hul boodskappe van ondersteuning aan Mandela en sy familie.

Hy het gesê Maandag is 'n spesiale dag vir Mandela. Die ikoniese leier het op 10 Desember 1993 die Nobelvredesprys ontvang.

– Volg Nuus24 op Twitter

- SAPA