Mandela ondergaan endoskopie

2012-12-16 13:00

Johannesburg – Oudpres. Nelson Mandela het Saterdagoggend 'n endoskopie ondergaan om galstene te laat verwyder en sterk aan in die hospitaal ná die suksesvolle prosedure, het die presidensie gesê.

"Vanoggend [Saterdag] het die oudpresident 'n prosedure via endoskopie ondergaan om die galstene te laat verwyder," het  Mac Maharaj, presidensiële woordvoerder, in 'n verklaring gesê.

"Die prosedure was suksesvol en Madiba sterk aan. Die mediese span het besluit om eers 'n longinfeksie te behandel voor hulle vasgestel het wanneer om die galstene te verwyder.

Maharaj het gesê toetse wat gedoen is nadat Mandela op 8 Desember gehospitaliseer is, het bekend gemaak dat hy 'n herhaalde longinfeksie het en dat hy galstene het.

Hy het gesê dokters het geen aanduiding gegee wanneer Mandela ontslaan sal word nie.

Die 94-jarige Mandela is verlede naweek vanaf sy huis in Qunu in die Oos-Kaap, na Pretoria geneem vir behandeling.

Dit is die langste sedert 2001 wat Mandela in die hospitaal is. Hy het toe sewe weke van radioterapie ondergaan nadat prostaatkanker by hom gediagnoseer is.

In Januarie 2011 is Mandela in 'n hospitaal in Johannesburg behandel vir 'n erge longinfeksie.

– Volg Nuus24 op Twitter

- SAPA