Mandela het ons teleurgestel, sê Winnie
2010-03-09 14:27
Johannesburg - Winnie Madikizela-Mandela het bitter uitlatings teenoor Nelson Mandela gemaak in ‘n onderhoud wat hierdie week in die London Evening Standard gepubliseer is.
Sy het gesê dat Suid-Afrika se eerste demokraties verkose president, wat ook haar voormalige man is, ‘n “korporatiewe basis” geword het wat “uitgestoot word om geld te maak.”
Madikizela-Mandela het ook vir Aartsbiskop Emeritus Desmond Tutu ‘n “idioot” genoem in die onderhoud met Nadira Naipaul, wat saam met haar man, die skrywer VS Naipaul, in Soweto kuier.
“Mandela het ons teleurgestel,” het Madikizela-Mandela gesê.
‘Slegte ooreenkoms vir swartmense’
“Hy het ooreengekom op ‘n swak ooreenkoms vir swartmense. Ekonomies staan ons steeds aan die buitekant.
“Die ekonomie is steeds meestal ‘wit’. Daar is ‘n paar swartmense wat op grond van tokenisme gekies is, maar so baie wat hulle lewe in die struggle gegee het, het sonder beloning gesterf,” het Madikizela-Mandela gesê in die onderhoud wat op www.standard.co.uk gepubliseer is.
Sy het ook gesê dat Mandela geen beheer meer oor die ANC het nie en dat hy net deur die Nelson Mandela-fonds gebruik word om geld in te samel.
Sy het gesê dat ander ook swaargekry het - dat Mandela nie die enigste een was nie.
“Hierdie naam Mandela is ‘n albatros om die nekke van my familie. Julle moet almal besef dat Mandela nie die enigste man was wat swaargekry het nie.”
Madikizela-Mandela het hom verder gekritiseer omdat hy die Nobelprys vir vrede in 1993 saam met FW de Klerk gaan haal het.
“Ek kan hom nie vergewe dat hy die prys saam met FW de Klerk, wat hom in die tronk geplaas het, gaan afhaal het nie. Hand aan hand het hulle gestap.”
- Sapa