Mandela 'gemaklik' ná nag in hospitaal
2012-12-09 13:47
Johannesburg – Nelson Mandela is "gemaklik", het die pres. Jacob Zuma Sondag gesê ná die voormalige president die nag in die hospitaal deurgebring het vir mediese toetse.
Pres. Zuma het Sondag 'n besoek afgelê by die 94-jarige oudpresident, en gesê hy is "gemaklik, en word goed versorg."
Die ikoniese leier is Saterdag in 'n hospitaal naby Pretoria opgeneem vir wat deur Zuma se woordvoerder, Mac Maharaj, beskryf is as toetse wat normaal is vir iemand van sy ouderdom.
Dis die tweede keer vanjaar wat Mandela in 'n hospitaal opgeneem is.
Keith Khoza, woordvoerder vir die ANC, het gesê "hy is gesond, alles gaan goed, dis maar net dat hy gereelde toetse moet ondergaan."
Amptenare het nie meer besonderhede oor sy toestand bekend gemaak nie.
Hoewel geen amptelike aankondiging gemaak is oor die hospitaal waar hy opgeneem is nie, is sekuriteit by 1 Militêre Hospitaal opgeskerp.
Die polisie deursoek alle voertuie wat die perseel binnegaan, het 'n fotograaf van die nuusagentskap AFP gesê.
Mandela het nog nie in die publiek verskyn sedert Suid-Afrika in 2010 die Sokkerwêreldbeker aangebied het nie.
Die vakverbond Cosatu het vroeër goeie wense aan Madiba gestuur.
"Ons hoop dis waar – soos die president se woordvoerder berig het – dat daar geen rede tot kommer is nie," het Patrick Craven, Cosatu se woordvoerder, in 'n verklaring gesê.
– Volg Nuus24 op Twitter.
- Sapa - AFP
