Man wen R20 milj met ou lottokaartjie
2009-09-02 07:08
Magdel Fourie
Johannesburg - ’n Man van Gauteng het vyf maande lank onbewustelik met ’n wen-lottokaartjie ter waarde van R20 miljoen in sy motor rondgery.
Die man van iets in die vyftig het sedert die lotto-trekking op 28 Maart met dié wenkaartjie in die sypaneel in sy motordeur gery, het Thembi Tulwana, Gidani-woordvoerder, gesê.
Dit het hom egter ontgaan tot hy vandeesweek op die kaartjie met die ses korrekte nommers daarop afgekom het.
“Ek het my kinders die dag by die skool gaan haal en was toevallig vroeg. Ek besluit toe om al my kaartjies in die deur se paneel na te gaan,” het hy gesê.
’n Handelaar het sy meer as 50 kaartjies nagegaan en hy het telkens tussen R30 en R100 in klein kontantpryse losgeslaan.
Die lottomasjien het egter aangedui die laaste kaartjie is “nie gemagtig om uit te betaal nie”.
“Ek het toe besluit om dié kaartjie na Gidani se kantore in Midrand te neem. Toe ek daar kom het hulle vir my gesê ek is R20 miljoen ryker,” het die man, wat ’n tegnikus is, vertel.
Tot dusver het hy nog geen feesvieringe beplan nie.
“Die eerste ding wat ek gaan doen is om al my skuld af te betaal, waarna ek ons huis gaan opknap en in my kinders se toekoms sal belê.”
- Die Burger