Man wat vrou met byl doodkap skuldig aan moord
2011-09-02 19:18
Johannesburg – ‘n Man van Soshanguve wat by ‘n
familie-partytjie in hegtenis geneem is ná hy sy vrou met ‘n byl doodgekap het,
is in die Pretoria Hooggeregshof skuldig bevind aan moord.
Regter Peter Mabuse het tydens die uitspraak
gesê dat Godfrey Sindi Macheke sy vrou met opset vermoor het en dat dit nié,
soos hy in sy verdediging gesê het, per ongeluk was nie.
Volgens Macheke het hy sy vrou per ongeluk doodgekap
toe hy die man met wie hy haar betrap het, met ‘n byl probeer bykom.
Hy sê hy het paniekerig geraak toe hy sien sy
vrou is dood en haar lyk na die Winterveld begraafplaas geneem waar hy haar
begrawe het.
Slegs ná die forensiese toetse tekens van
bloed in Macheke se huis gevind het, het Macheke die polisie na haar lyk
geneem.
Intussen het hy vir familie en vriende wat gevra
het waar sy vrou is gesê dat sy haar ouers besoek.
‘n Nadoodse ondersoek het getoon dat sy vrou ‘n
kopwond en gekraakte skedel sowel as ander gebreekte bene in haar gesig en
hande gehad het.
Macheke se storie het duidelik nié met die lykskouer se bevindinge
ooreengestem nie.
Macheke sal die 12de Desember weer in die hof
verskyn wanneer hy sy vonnis sal aanhoor.
Volg Nuus24 op Twitter.
- SAPA