Man wat ryloop, deur ses mans verkrag

2013-02-16 15:00

Johannesburg – Die polisie in Noordwes het Saterdag bevestig dat hulle na ses verdagtes soek wat na bewering 'n 32-jarige man Donderdag naby Mooinooi verkrag het.

Brigadier Thulani Ngubane het gesê die slagoffer het geryloop van sy werk in Rustenburg na sy huis in Kroondal, sowat 5km verder, toe 'n wit Toyota Hilux-bakkie met ses insittendes aangebied het om hom 'n saamry-geleentheid te gee.

“Daar word verder beweer dat die mans verby sy woonplek gery het. Hulle het onderweg na Mooinooi in die veld in gery en op die man se beursie aangedring, maar hy het glo nie geld gehad nie,” het Ngubane gesê.

“Die man beweer die verdagtes het hom met 'n onbekende dwelmmiddel ingespuit, 'n plastieksak oor sy kop getrek, om die beurt verkrag en in ‘n veld gelos.”

Die man is na die voorval na die hospitaal in Rustenburg geneem.

Ngubane het bevestig dat daar Vrydag 'n saak van verkragting aanhangig gemaak is.

Volg Nuus24 op Twitter.

- SAPA