Man wat rits misdade pleeg was op parool
2011-11-04 14:14
Johannesburg – 'n Man wat die afgelope week ‘n rits misdade gepleeg het, is verlede maand op parool vrygelaat, het die polisie in Pretoria Vrydag gesê.
“Hy is ná ‘n inbraak in 2009 na die tronk in Boksburg gestuur. Hy is tot vier jaar tronkstraf gevonnis. Hy is op 21 Oktober op parool vrygelaat,” het ao. Annabel Middelton gesê.
Sy kon nie die rede vir sy vroeëre vrylating of die voorwaardes van sy parool gee nie.
Die 21-jarige het Maandag vuurwapens tydens ‘n huisbraak gesteel, waarna hy ‘n man in ‘n blommewinkel doodgesteek en ‘n vrou in ‘n kerk verkrag het.
Hy is deur die polisie opgespoor en is gehospitaliseer nadat hy in die kop geskiet is, het Middelton vroeër in die week in ‘n misdaadverslag gesê.
“[Hy] het Maandagoggend by ‘n huis in Retiefstraat in Lyttelton ingebreek, waar hy twee vuurwapens, twee selfone, ‘n armhorlosie en ‘n skootrekenaar gesteel het. Hy het ‘n huishulp met skoenveters vasgebind en gevlug.
“Hy het na Cradockrylaan gehardloop en ‘n blommewinkel deur ‘n venster binnegegaan. ‘n Bakleiery het uitgebreek en hy het ‘n man, Peter Ntona-Maleka, 54, doodgesteek toe hy hom probeer verhoed het om die winkel te beroof.”
Die man het gevolglik na ‘n nabygeleë kerk op Unie-laan gevlug, waar hy die vrou aangeval en verkrag en daarna haar selfoon gesteel het.
Die man is in elkeen van dié voorvalle beseer en die polisie het sy bloedspoor tot by 'n kerk gevolg.
Toe die polisie by die kerk aankom, het die man die man die vrou gyselaar gehou. Sy het later ontsnap.
Skote is gevuur en die man is in die hand en die kop getref. Hy is onder polisie-toesig na Tembisa-hospitaal geneem.
Die polisie het die gesteelde items gevind, sowel as die verkragting-slagoffer se selfoon.
Afhangende van die man se beserings sal hy op 9 of 16 November in die Pretoria-landdroshof verskyn, het Middelton gesê.
– Volg Nuus24 op Twitter
- SAPA