Man wat glo vrou vermoor op Facebook opgespoor
2011-06-23 09:07
Nelspruit – 'n Voortvlugtige boer van Limpopo wat sy nuwe vrou glo vyf jaar gelede doodgery het, is Woensdag aan Suid-Afrika uitgelewer nadat hy deur middel van ’n Facebook-groep in Zambië opgespoor is.
Fanie Terblanche (41) van Mokopane (Potgietersrus) het omstreeks 17:30 onder bewaking van sowat ses Interpol-beamptes op ’n vlug van Lusaka op die O.R. Tambo-lughawe aangekom.
Lede van die Mokopane-polisie en die Valke het Terblanche ingewag, waarna hy buite die gebou gearresteer is. Hy is kort daarna in ’n polisievoertuig gelaai en na Mokopane geneem waar hy na verwagting môre of Maandag in die landdroshof sal verskyn.
Terblanche het sy bruid van twee maande, Lizette (45), glo omstreeks middernag op 14 Oktober 2006 met sy Toyota Hilux-4x4-bakkie doodgery.
Volgens haar skoonsuster, Liesl Hobbs (37), het Lizette ’n paar weke voor haar dood aan ’n familielid gesê sy vermoed Terblanche wil haar vermoor.
Daar word beweer hy het oor sy vrou en tante, ene Letitia, gery.
Hy het die tante, wat nog geleef het, na bewering in die pad gelos en Lizette se lyk glo in die bakkie gelaai en ure lank daarmee rondgery.
Letitia het hulp ontbied, maar Terblanche het later by haar en haar man se plaas stilgehou en na bewering met ’n vuurwapen op hulle losgebrand. Terblanche het daar weggejaag en is buite Hobbs se huis in die dorp aangekeer en gearresteer.
“Hy is herhaaldelik borgtog in die Mokopane-landdroshof geweier, maar hy is later in die Pretoria-hooggeregshof borgtog van R10 000 toegestaan. Hy het daarna spoorloos verdwyn en nooit opgedaag vir sy volgende hofverskyning nie,” het Hobbs gesê.
Volgens haar het niemand geweet waar Terblanche geskuil het nie en sy het toe die Facebook-groep “Help us find Fanie Terblanche – He killed my sister and is on the run!” gestig.
“Hy was elke keer ’n stap voor ons, maar ongelukkig vir hom is hy ’n mannetjie wat nie sy maniere verander nie. ’n Vrou in Livingstone het hom op Facebook herken terwyl hy met haar vriendin uitgegaan het. Ons het alles stilgehou totdat hy gearresteer is,” het Hobbs gesê.
Terblanche het glo destyds ’n familielid se paspoort gebruik om na Botswana en van daar na Zambië te vlug. Hy het na bewering vervalste identiteitsdokumente gekoop en onder meer die name Stephan Ross en Phillip Ross gebruik.
Volgens ’n bron in Zambië het Terblanche enkellopende vroue opgesoek, by hulle ingetrek en hulle het hom dan onderhou.
’n Polisietaakmag, gewapen met AK47-gewere, het Terblanche op 8 Mei (Moedersdag) in Livingstone aangekeer.
“My skoonma het langs my gestaan toe ek die oproep gekry het. Dit is die beste geskenk wat sy en Lizette se drie kinders vir Moedersdag kon kry. Ons is ongelooflik bly. Hy gaan vanaand minder as ’n kilometer van ons huis af in die polisieselle deurbring,” het Hobbs gesê.
Kol. McIntosh Polela, woordvoerder van die Valke, het gesê voordat Interpol aansoek kon doen om Terblanche uit te lewer, het die owerheid hom gedeporteer.
“Interpol-beamptes het Terblanche hierheen vergesel en hy sal vanaand (Donderdag) terug in Mokopane wees,” het Polela gesê.
Lizette word oorleef deur drie kinders uit ’n vorige huwelik, Dyllan (31), Niell (27) en Jany (20).
Volg Nuus24 op Twitter
- Beeld