Man wat Goldin help ontvoer kry nie parool
2011-11-17 09:09
Stellenbosch – Dit was ’n lang, uitmergelende dag, maar Denise Goldin was Woensdag tevrede toe die paroolaansoek van die man wat ’n aandeel in die ontvoering van haar seun gehad het, verwerp is.
Nurshad Davids (20) is in 2007 tot 15 jaar tronkstraf gevonnis weens sy betrokkenheid by die ontvoering in 2006 van die akteur Brett Goldin (26) en sy vriend, die modeontwerper Richard Bloom (26). Hy was ook betrokke by die roof van hul goedere en geld.
Hy het Woensdag ná minder as ses jaar in die tronk voor die paroolraad by die Drakenstein-gevangenis buite Franschhoek verskyn.
Simphiwe Xako, ’n woordvoerder van die departement van korrektiewe dienste, het aan Die Burger gesê die aansoek is verwerp omdat dit “voortydig” was.
“Kragtens wet moet die skuldige twee derdes van sy tronkstraf uitdien voordat hy om parool kan aansoek doen,” het Xako bygevoeg.
Davids, wat tot dusver vyf jaar en vyf maande van sy vonnis uitgedien het, sal eers weer op 25 Mei 2014 voor die paroolraad verskyn.
Me. Goldin het ná ’n vyf uur lange paroolverhoor, wat sy bygewoon het, gesê: “Dit was uitputtend, maar ek is tevrede dat sy paroolaansoek vir nou verwerp is. Wat in die verhoor gesê is, bly in die verhoor.”
Goldin, wat bekend was vir sy rol in die Crazy Monkey-fliek, en Bloom is op 16 April 2006 deur Davids, Jade Wyngaard, Shavaan Marlie en Clinton Davids ontvoer, beroof en doodgeskiet.
Die vermoordes se naakte lyke is ’n dag later langs die M5-snelweg by Mowbray gevind.
Wyngaard is vir sy aandeel tot 12 jaar tronkstraf gevonnis.
Marlie en Clinton Davids dien elk 28 jaar tronkstraf uit.
Meer as 3 000 Suid-Afrikaners het hul stemme by ’n Facebook-versoekskrif teen die moontlikheid van parool vir Nurshad Davids gevoeg.
Me. Goldin het gesê sy is oorweldig deur al die ondersteuning en dit bring vir haar emosionele genesing.
– Volg Nuus24 op Twitter
- Die Burger