Man vlug ná skietery by laerskool

2012-01-24 10:00

Johannesburg – ‘n Skietery het tussen die polisie en ‘n gewapende man by die Bryanston parallelmedium-laerskool se parkeerterrein uitgebreek, het die Gautengse polisie gesê.

Volgens kapt. Kym Cloete is niemand beseer nie.

Die polisie het Dinsdag om 07:20 ‘n verdagte man in ‘n swart Subaru in die parkeerterrein opgemerk.

Cloete sê die man het ‘n vuurwapen uitgeruk en begin skiet toe die polisie die voertuig genader het.

“Die polisie het sy voertuig met hul motor probeer blok, maar hy het dit ontduik.”

‘n Skietery het uitgebreek.

Volgens Cloete het die man ‘n ander motor getref terwyl hy in sy Subaru gevlug het.

Die polisie weet nie of die verdagte in die skietery beseer is nie.

Die polisie vermoed dat die man by ‘n sindikaat betrek word. Dié spesifieke sindikaat lol met motoralarmstelsels wanneer voertuie gesluit is.

Cloete sê die bende het laerskole in die Sandton-gebied geteiken.

Volg Nuus24 op Twitter

- SAPA