Man vermoor, vrou beseer tydens rooftog
2012-09-19 18:26
Johannesburg – ‘n Man is vermoor en sy vrou is beseer tydens ‘n rooftog by hul huis in Middelburg, het die polisie in Mpumalanga Woensdag gesê.
Sers. Gerald Sedibe sê Jan en Marietjie du Toit is Dinsdag omstreeks 16:00 deur twee mans by hul huis aangeval.
Die mans het die deure na die egpaar se huis oopgebreek en hulle aangeval.
Jan is op die toneel dood verklaar en Marietjie is vir behandeling na ‘n hospitaal geneem.
Sedibe sê dis nog nie bekend of enigiets uit die huis gesteel is nie.
Die Demokratiese Alliansie in Mpumalanga het die moord veroordeel en het ‘n beroep gedoen op die provinsiale polisiekommissaris, lt.genl. Thulani Ntobela, om ‘n plan vir die bekamping van misdaad op te stel.
“Die DA is baie bekommerd oor die aanval en die toenemende kriminele optrede in ons provinsie.
“Misdadigers hardloop wild rond, ten spyte van die polisie se pogings, en terroriseer inwoners in die provinsie met die selfvertroue dat die kanse dat hulle gevang word, baie skraal is,” het Anthony Benadie, DA-leier in die provinsie, gesê.
Benadie sê sigbare polisiëring en inisiatiewe teen misdaad is onvoldoende en oneffektief en dit is ‘n kwessie wat onmiddellik aangespreek moet word.
Niemand is tot dusver in hegtenis geneem nie.
Die polisie ondersoek ‘n saak van moord en roof.
– Volg Nuus24 op Twitter
- SAPA
