Man vermoor ná stryery oor selfoon
2011-08-25 20:06
Johannesburg – ‘n Man is met klippe doodgegooi op ‘n bouperseel naby Hammanskraal ná ‘n stryery oor ‘n selfoon, het die polisie in Mpumalanga Donderdag gesê.
Twee mans het Woensdag omstreeks 17:00 klaargemaak met werk by Lefiso Village toe ‘n argument tussen hulle ontstaan het, het sers. Hastings Chaane gesê.
Een van die mans, wat 36 jaar oud is, het sy kollega daarvan beskuldig dat hy sy selfoon gesteel het. Hy het toe klippe en bottels opgetel en sy kollega herhaaldelik daarmee bestook totdat hy inmekaargesak het.
Die beseerde man, wat vermoedelik in sy laat 20’s is, is na ‘n plaaslike kliniek geneem, waar hy met aankoms gesterf het.
Die werkers was besig om klaskamers te bou by die Lefiso-laerskool.
Volgens Chaane het die polisie ‘n verdagte op die toneel in hegtenis geneem kort ná die voorval. Hy sal na verwagting Vrydag in die Temba-landdroshof verskyn op aanklag van moord.
- Volg Nuus24 op Twitter
- SAPA